In aankhon mein ab ashk to nahin,
par ek arse se muskura na sake hum.
In labon pe ab tera naam bhi nahin,
par is dil se tumhe nikaal na sake hum.
Mita di teri yaadon se judi har nishani humne,
par teri woh yaadein hi mita na sake hum.
May 7, 2008
May 6, 2008
Duniya ke liye woh bus ek barsaat ki raat hogi,
par jaise khuda bhi roya tha us raat.
Nahin thi ummeed phir unse kabhi mulakaat hogi,
bus dua thi ke samay ruk jata us raat.
Bichode ka soch aankhen unki bhi nam huyin hogi,
par is dil ki to jaise dhadkan hi tham gayi us raat.
May 4, 2008
Teri yaad mein kabhi kabhi do ghoont laga lete hain,
teri tasveer dekh kar hi thoda thoda muskura lete hain.
Nahin lagta yeh dil kisi mehfil mein tere bina,
hum to tanhai mein hi tujhe yaad kar.. mehfil saja lete hain.
May 2, 2008
Door tumse tab bhi na the,
door tumse ab bhi nahin.
Kuch faasle aa gaye hamare beech,
par dil se door tum ik pal bhi nahin.
Kabhi dil se dil ko yaad karke to dekh,
yeh dooriyaan kuch bhi nahin.
Apr 30, 2008
Na pehchan sake woh is dil ko kabhi,
na samajh sake…ai Dost.. tere liye mera pyar kabhi.
Har din ilzaam lagte hain is dil par sabhi,
par mera yeh pyar kam na hoga kabhi.
Lad jaoon saare jahan se jo tujhpe aanch aye koi,
bus teri dosti ka yeh saath na chhute kabhi.
Apr 27, 2008
Zindagi ke har mod par.. naye rishte ban jaate hain,
kuch pal do pal ke.. to kuch khud se bhi aziz ho jaate hain.
Nahin thakti yeh aankhen.. teri rah takte takte,
tumse milne ke ehsaas mein har dard bhool jaate hain.
Nahin bhoolti teri kahi koi bhi baat,
teri baatein yaad kar.. yeh lab.. tanhai mein bhi muskura jaate hain.
Kabhi kabhi is dil ko.. hoti hai kuch shikayat us khuda se,
par tumhe apni zindagi mein dekh.. sab shikwe door ho jaate hain.
Zindagi ke har mod par.. naye rishte ban jaate hain,
kuch bus pal bhar ke.. to kuch umar bhar ka saath ban jaate hain.
Apr 22, 2008
Tera saath nahin par har taraf tujhe hi dekhta hoon,
teri bewafai mein bhi kahin wafa main dhoondta hoon.
Jaam uthata hoon tere diye gam bhulane ke liye,
par do ghoont peete hi.. har jaam mein bhi tera hi chehra dekhta hoon.
Apr 21, 2008
Ittefaq se mile is dost ko kabhi door na hone dijiyega,
ki jaam hai yeh.. saaki se kabhi door na ise kijiyega.
Aapki muskurahat ka hi hua tha main kayal,
aap bus yuhin sada muskurate rahiyega.
Aur jab na ho wajah muskurane ki zindagi mein koi,
to hamare saath bitaye kuch pal hi yaad kar lijiyega.
This one was initiated on a chat session with my sis.. my friend.. long time back. I said the first line (I modified it a little).. and she came up with the second. Since then.. it was just sitting on my desktop and it took me quite a while to come up with something to complete it.
Mar 17, 2008
Aapka ek aur janamdin nazdeek aya,
mujhe mere credit card pe bahut taras aya.
Dil bola ek gift hi order kar lo,
card bola thoda balance to transfer kardo.
Arre unki bahut hai value mere bhai,
card bola mera APR bhi bahut hai high.
Thaan liya ke ek tohfa to bhej kar rahenge,
card bola hum bhi Over The Limit ja kar rahenge.
Over the limit hua to yeh card bhi freeze ho jayega,
phir bill na diya to yeh phone bhi cease ho jayega.
Socha ke tum mere tohfe ke bina to jee loge,
par meri good night call ke bina na so paoge.
Bahut soch humne tohfe ka idea kiya trash,
is saal tum bus hamari wishes hi kar lo cash.
Mar 16, 2008
Taras jaate hain tumhari ek awaaz sunne ko,
duniya se door.. kuch pal tere saath bitaane ko.
Tumne to na jaane kyun.. mooh hi mod liya humse,
par hum to mauka dhoondte hain tujhpe jaan tak lutane ko.
Mar 14, 2008
Athrah ke huye to socha drving license banwayen,
ab to bin dare Ludhiane ki sadkon pe gaadi chalaayen.
Papaji ne kaha.. beta.. license to main tera ghar baitha banwa doon,
par sochta hoon ke tujhe sarkari daftaron ke darshan to karva doon.
Jawani ke josh mein Papaji ki baat humne maan li.
apna license khud banwane ki humne bhi thaan li.
Subah subah form jama karvane.. hum to kachehri ko nikal gaye,
aage pacchas logon ki kataar dekh.. hamare to pasine hi nikal gaye.
Himmat na haar.. hum bhi lag gaye apne number ke intezaar mein,
laga jaise ek masoom.. phas gaya ho zaalimon ke bazaar mein.
Number mera aya.. to humne chain ki saans li,
par afsar ne form attest karane ko bol.. meri phir jaan li.
Notary se humne form attest karvaya,
paanch baj gaye to humne kachehri ko band hi paya.
Agle din hum phir lage usi kataar mein,
Par afsar bola aapne Notary ka chakkar lagaya ekdum bekaar mein.
Tehsildar ka attest kiya huya form hi hum lete hain,
baat nahin mani to hum tension bhi bahut dete hain.
Tehsildar ka office mila to unhe kisi meeting mein paya,
peon bola intezaar karo.. main sahib ka status dekh kar ke aya.
Dus minute dus minute karte.. ghadi ne phir paanch dikha diye,
hataash ho phir.. humne apne kadam ghar ko bada liye.
Subah subah daftar ke bahar humne phir apna dera jamaya,
tees rupaye doge to kaam hoga.. wohi peon chillaya.
Itni baat thi to kal hi keh dena chahiye tha,
woh bola.. kaam kaise hota hai.. aapko to pata hi hona chahiye tha.
Form attest huya to hum kataar mein phir lag gaye,
bina koi dar.. sadkon pe drive karne ke sapney phir jag gaye.
Is baar afsar bola blood group ka proof dikhao,
mere medical card ko expired dekh kehta blood test tum phir se karao.
Card expired hai bhaiya par blood group to change na hoga,
bola.. test dobara nahin karaya to tumhara kaam bhi na hoga.
License ke khatir humne phir ek sui bhi lagvayi,
license to mila lekin itna hone par bhi mujhe akal na ayi.
Chota bhai athrah ka hone pe poochta hai license kaise banwaoonga,
Papaji ne mujhe dekha to maine keh diya.. hanji Papaji.. ise bhi main hi le jaoonga.
This is what I had to go through to get my Driver’s License…
Mar 10, 2008
Ek pari ka hua tha main deewana,
uske suroor mein bhool jata tha saara zamana.
Uski baaton mein phoolon si mehak hoti,
uski chuppi mein bhi ek ajab si chahek hoti.
Mere har dard mein aankhen uski nam hoti,
uski har mannat mein khushiyan bus meri hi shamil hoti.
Phir ik din mujhe beech majhdaar chod.. alvida keh gayi woh is duniya ko,
uska saath hota to sahil tak pahaunchne ki khwaish to hoti.
Jan 14, 2008
Kal raat hue tere deedar ek khwab mein,
subah jab khwaab tuta.. to aa gaye kuch ashk meri aankh mein.
Is janam mein to shayad phir na milna hoga kabhi,
par dua hai ke har raat ko ho saath tera.. khwabon mein hi sahi.
Nov 22, 2007
Tujhe dekh kar sochta hoon.. zindagi itni haseen bhi ho sakti hai.
Tera saath ho to… patjhad mein bhi… phoolon ki barsaat ho sakti hai.
Kuch cheezon ka koi mol nahin lagaya jaata par phir bhi…
teri ek muskurahat ki keemat… meri jaan bhi ho sakti hai.
Oct 25, 2007
Kal phir mil gaye tum zindagi ke ek aur mod par,
yaad aa gaye woh lamhe.. jinhe aa gaye the hum peeche chod kar.
Kabhi umar bhar ka saath nibhane ke waade kiye the humse,
aaj humse hi nazaren chura rahe ho kisi aur ka daaman tham kar.
